Costitución d'Agora Repúbliques
- Categoría: Europa
Ayeri tuvo llugar la firma del documentu de costitución de la coallición Agora Repúbliques, integrada por Esquerra Republicana de Cataluña, EH Bildu, BNG, Puyalón, Ahora Canarias y Andecha Astur, y que concurrirá a les elleiciones europees del 26 de mayu.
Esta coallición elleutoral cientrará los sos esfuerzos en reivindicar los drechos de les presones y los pueblos, una ferramienta democrática que mos permita defender les llibertaes, los drechos nacionales y sociales, y una democracia digna, faciendo frente a la monarquía, y al resurdir de la estrema drecha n´Europa.
La participación nesta coallición multiplica'l valir políticu d'Andecha Astur, al garantizar la so presencia a nivel estatal y européu, y per ende, aporta una voz propia que represente y defenda los drechos presonales y colleutivos del pueblu asturianu.
Andecha Astur ye la única candidatura asturiana nestes elleiciones
- Categoría: Asturies
El panorama políticu asturianu queda perbien espeyáu nes candidatures presentaes a les elleiciones estatales del 28 d’abril. Namás hai una candidatura asturiana: la d'Andecha Astur.
La involución del asturianismu /autonomisnu políticu haza formes de dependencia estatalista llevó al seutor más de cientru-drecha haza Foro, que se presenta col PP, dempués d’una esclariaora campaña pola “Xunidá d’España”, y al de posiciones polítiques de cientru-izquierda a Podemos-IU, renunciando en dambos casos a trabayar por un proyeutu políticu asturianu propiu y convirtiéndolos nuna mera sucursal española n’Asturies. Esto fae d’Andecha Astur l’únicu referente nacional nestes elleiciones como representación del Soberanismu d’izquierda.
L’apueste fechu por Andecha Astur aniciando un proyeutu políticu ampliu, vidable y creyible, que permita avanzar a la sociedá asturiana nel necesariu procesu de tresformación social y nacional, garantizando los drechos individuales y colleutivos de los asturianos y asturianes, vese reforciáu frente al derrotismu y la sumisión que supón acabar siendo una sucursal madrilana n’Asturies.
Leer más: Andecha Astur ye la única candidatura asturiana nestes elleiciones
Illusión y enfotu na presentación d’Agora Repúbliques
- Categoría: Europa
La presentación de la coallición Agora Repúbliques, na que participa Andecha Astur, tresmitió la illusión del nueu proyeutu y l’enfotu de les organizaciones que lu conformen.
VER INTERVENCIÓN DE LLUCÍA FERNÁNDEZ
Nel actu, qu’entamó cola actuación de Fontoria Folk, intervienieron Josu Juaristi d’EHBildu, candidatu a Europarllamentariu por Agora Repúbliques, Pau Morales d’ERC, y Llucía Fernández, candidata al Congresu por Andecha Astur.
El primeru n’intervenir foi Josu Juaristi, que recordó qu’esta coallición tien afortunaos precedentes na previa de Los Pueblos Deciden, anque nesta ocasión aumentando’l númberu participantes na mesma, llamando a poner en valor el fechu d’algamar representación nel parllamentu européu, especialmente agora que la estrema drecha va ganando posiciones y que fai más falta que nunca enfrentase a ella en tolos frentes y ensin contemplaciones.
Leer más: Illusión y enfotu na presentación d’Agora Repúbliques
Presentaes les candidatures d’Andecha Astur al Congresu y al Senáu español
- Categoría: Asturies
Ésitu de la Campaña ¡10.000 firmes pola República!
Na nuechi d’ayeri, Andecha Astur presentó los avales a la candidatura desixíos pola llei elleutoral española pa presentase a les elleiciones, yá que tres la postrer reforma de la llei elleutoral, los partíos políticos ensin representación nestes istituciones tenemos que consiguir avales, nel nuesu casu precisamos recoyer unes 1.000 firmes de presones censaes n’Asturies.
Pero como n’Andecha Astur tamos comencíos que somos munchos más los que tamos dimpuestos a implicamos nun proyeutu en defensa de la República, propunxímosmos algamar les 10.000 firmes, pa que quede nidio que les asturianes y asturianos apostamos dafechu por un modelu d'Estáu propiu, bramente democráticu, que garantice los nuesos drechos individuales y colleutivos.
Leer más: Presentaes les candidatures d’Andecha Astur al Congresu y al Senáu español
Fadremos d’eses diez mil firmes diez mil voces, diez mil puños n’altu y diez mil presones dimpuestes a lluchar pola republica asturiana
- Categoría: Europa
Intervención de Llucía Fernández, candidata d'Andecha Astur al Congresu español, nel actu de presentación d'Agora Repúbliques.
Pa entamar quiero decir que pa los que somos Andecha Astur ye permotivante ya illusionante participar nesti procesu y formar parte d’Agora Repúbliques xunto con otres fuercies soberanistes.
Tamos orgullosos de participar nesta suma d’enfotos de tolos pueblos del Estáu que nagüen por un modelu socialista y democráticu, que defenden el drechu al autodetermín, que lluchen pola xusticia social, pol acabu la corrución y por un futuru dignu pa caún na so propia patria.
Un proyeutu que mos permite ufiertar una alternativa política con posibilidaes riales de condicionar de forma efeutiva la política a nivel d’Estáu y avanzar con ello nel procesu d’esaniciu de la monarquía española y l’aniciu d’un procesu costituyente de Repúbliques que tengan los sos pegollos llantaos nos drechos y llibertaes presonales y colleutives.
Dientru y fuera d’Asturies, Ye tiempu de sumar fuercies.
