Imprimir
Categoría: Asturies

El panorama políticu asturianu queda perbien espeyáu nes candidatures presentaes a les elleiciones estatales del 28 d’abril. Namás hai una candidatura asturiana: la d'Andecha Astur.

La involución del asturianismu /autonomisnu políticu haza formes de dependencia estatalista llevó al seutor más de cientru-drecha haza Foro, que se presenta col PP, dempués d’una esclariaora campaña pola “Xunidá d’España”, y al de posiciones polítiques de cientru-izquierda a Podemos-IU, renunciando en dambos casos a trabayar por un proyeutu políticu asturianu propiu y convirtiéndolos nuna mera sucursal española n’Asturies. Esto fae d’Andecha Astur l’únicu referente nacional nestes elleiciones como representación del Soberanismu d’izquierda.

L’apueste fechu por Andecha Astur aniciando un proyeutu políticu ampliu, vidable y creyible, que permita avanzar a la sociedá asturiana nel necesariu procesu de tresformación social y nacional, garantizando los drechos individuales y colleutivos de los asturianos y asturianes, vese reforciáu frente al derrotismu y la sumisión que supón acabar siendo una sucursal madrilana n’Asturies.

Les dificultaes que supón llegar a estes elleiciones pa una organización política que carez un bloquéu mediáticu sistemáticu, y faciendo frente a una llexislación estatal que pon inxustificables torgues a la participación democrática, fueron superaes con munchu enfotu y col sofitu que recibió la campaña ¡10.000 firmes pola República!, un auténticu ésitu ensin precedentes na hestoria recién d’Asturies,  que permitió afitar la esistencia d’una base social alrodiu la República Asturiana, y qu’agora ponmos na tesitura de pasar eses firmes a votos, a compromisos col proyeutu.

Nestes elleiciones, anque Andecha Astur se presente como tala, faelo participando na coallición Agora Repúbliques, xunto con ERC, EHBildu, BNG, Puyalón y Ahora Canarias, presentando de cabezalera al Congresu a Llucía Fernández, y a Arturu Xosé Bermeyu al Senáu.