Ayeri tuvo llugar la firma del documentu de costitución de la coallición Agora Repúbliques, integrada por Esquerra Republicana de Cataluña, EH Bildu, BNG, Puyalón, Ahora Canarias y Andecha Astur, y que concurrirá a les elleiciones europees del 26 de mayu.

Esta coallición elleutoral cientrará los sos esfuerzos en reivindicar los drechos de les presones y los pueblos, una ferramienta democrática que mos permita defender les llibertaes, los drechos nacionales y sociales, y una democracia digna, faciendo frente a la monarquía, y al resurdir de la estrema drecha n´Europa.

La participación nesta coallición multiplica'l valir políticu d'Andecha Astur, al garantizar la so presencia a nivel estatal y européu, y per ende, aporta una voz propia que represente y defenda los drechos presonales y colleutivos del pueblu asturianu.

La presentación de la coallición Agora Repúbliques, na que participa Andecha Astur, tresmitió la illusión del nueu proyeutu y l’enfotu de les organizaciones que lu conformen.

VER VIDIU

VER INTERVENCIÓN DE LLUCÍA FERNÁNDEZ

Nel actu, qu’entamó cola actuación de Fontoria Folk, intervienieron Josu Juaristi d’EHBildu, candidatu a Europarllamentariu por Agora Repúbliques, Pau Morales d’ERC, y Llucía Fernández, candidata al Congresu por Andecha Astur.

El primeru n’intervenir foi Josu Juaristi, que recordó qu’esta coallición tien afortunaos precedentes na previa de Los Pueblos Deciden, anque nesta ocasión aumentando’l númberu participantes na mesma, llamando a poner en valor el fechu d’algamar representación nel parllamentu européu, especialmente agora que la estrema drecha va ganando posiciones y que fai más falta que nunca enfrentase a ella en tolos frentes y ensin contemplaciones.

Esti vienres 22 tendrá llugar la presentación oficial de la coallición Agora Repúbliques na que participa Andecha Astur, y que concurre a les prósimes elleiciones estatales del 28-A.

L’actu de presentación d’ Agora Repúbliques tendrá llugar na Escuela Comerciu de Xixón (C/ Francisco Tomás y Valiente), a les 19 hores, y nel mesmu intervendrá Josu Juaristi d’EHBildu, candidatu a Europarllamentariu por Agora Repúbliques, Pau Morales d’ERC, y Llucía Fernández, candidata al Congresu por Andecha Astur.

La coallición Agora Repúbliques, de la que forma parte Andecha Astur, ta costituyía por fuercies soberanistes de Catalunya (ERC), Euskal Herría (EH Bildu), Galicia BNG), Aragón (Puyalón), y Canaries (Ahora Canarias), lo que permite ufiertar una alternativa política con posibilidaes riales de condicionar de forma efeutiva la política a nivel d’Estáu y avanzar nel procesu d’esaniciu de la monarquía española y l’aniciu d’un procesu costituyente de Repúbliques de drechos y llibertaes presonales y colleutives.

Intervención de Llucía Fernández, candidata d'Andecha Astur al Congresu español, nel actu de presentación d'Agora Repúbliques.

Pa entamar quiero decir que pa los que somos Andecha Astur ye permotivante ya illusionante participar nesti procesu y formar parte d’Agora Repúbliques xunto con otres fuercies soberanistes.

Tamos orgullosos de participar nesta suma d’enfotos de tolos pueblos del Estáu que nagüen por un modelu socialista y democráticu, que defenden el drechu al autodetermín, que lluchen pola xusticia social, pol acabu la corrución y por un futuru dignu pa caún na so propia patria.

Un proyeutu que mos permite ufiertar una alternativa política con posibilidaes riales de condicionar de forma efeutiva la política a nivel d’Estáu y avanzar con ello nel procesu d’esaniciu de la monarquía española y l’aniciu d’un procesu costituyente de Repúbliques que tengan los sos pegollos llantaos nos drechos y llibertaes presonales y colleutives.

Dientru y fuera d’Asturies, Ye tiempu de sumar fuercies.

La prósima convocatoria elleutoral europea centró l’aconceyamientu ente les dos formaciones de la coalición europea Los Pueblos Deciden

Na xornada d’ayeri una dellegación del BNG aconceyo nel llocal d’Andecha Astur en Xixón con miembros de la Xunta Executiva, p’aldericar al rodiu de la prósima convocatoria d’elleiciones europees y la conformación de la coalición que sedrá más amplia que la esistente de Los Pueblos Deciden al incorporase a la mesma ERC, y otres organizaciones del Estáu español.

L’aconceyamientu sirvió pa compartir les visiones y proyeutos alrodiu d’esta nueva coalición, y tamién p’afitar les rellaciones ente les dos organizaciones polítiques nacionaliegues, dándose un intercambiu de valoraciones alrodiu de la situación nes respeutives naciones nel planu socio-económicu y cultural, asina como’l papel de la izquierda sucursalista como encontu del modelu estatalista d’anguañu.