La presentación de la coallición Agora Repúbliques, na que participa Andecha Astur, tresmitió la illusión del nueu proyeutu y l’enfotu de les organizaciones que lu conformen.

VER VIDIU

VER INTERVENCIÓN DE LLUCÍA FERNÁNDEZ

Nel actu, qu’entamó cola actuación de Fontoria Folk, intervienieron Josu Juaristi d’EHBildu, candidatu a Europarllamentariu por Agora Repúbliques, Pau Morales d’ERC, y Llucía Fernández, candidata al Congresu por Andecha Astur.

El primeru n’intervenir foi Josu Juaristi, que recordó qu’esta coallición tien afortunaos precedentes na previa de Los Pueblos Deciden, anque nesta ocasión aumentando’l númberu participantes na mesma, llamando a poner en valor el fechu d’algamar representación nel parllamentu européu, especialmente agora que la estrema drecha va ganando posiciones y que fai más falta que nunca enfrentase a ella en tolos frentes y ensin contemplaciones.

Darréu intervino Pau Morales –ERC-, que tresmitió la situación política agora mesmo esistente en Cataluña, la situación de los presos políticos y la falta de respetu del Estáu español a los más ellementales drechos democráticos, afirmando que “nin la represión, nin la violencia d’Estáu, nin los recortes de drechos sociales mos achantarán. Los pueblos que sofriemos l’Estáu decidiemos ganar. De la cayía del réxime del 78 ñacerán les Repúbliques de pueblos llibres!”

Dempués d’esta intervención tocó-y el turnu a Llucía Fernández, que cientró la so intervención en destacar cómo dende Andecha Astur ta trabayándose por aniciar un proyeutu políticu viable que mos permita avanzar na tresformación social, garantizando les lliberates y drechos presonales y colleutivos, y cómo esta coallición permite dar un pasu alantre nesi sen.

“Nun ye tiempu de llorar, nin de mirar pa otru llAu, nun ye tiempu de mendigar ayudes nin de sentase a esperar a ver qué mos manden dende Madrid. Dientro y fuera d’Asturies, ye tiempu de sumar fuercies, y ye por ello qu’Andecha Astur preséntase énte’l pueblu asturianu comu una ferramienta d’organización que permita xunir fuercies p’avanzar hacia una República Asturiana na que’l pueblu seya, otra vegada, soberanu” afirmó.

A la fin de la so intervención recordó l’antidemocrática llexislación española qu’obliga a los partíos minoritarios a algamar avales pa poder participar nes elleiciones estatales. “Desixéronmos 1.000 firmes pa poder  presentamos a les elleiciones y nós diximos que non, que conseguiríemos diez mil firmes, y nós fadremos d’eses diez mil firmes diez mil voces, diez mil puños n’altu y diez mil  presones dimpuestes a lluchar pola republica asturiana.”

Tres les intervenciones polítiques tuvo llugar un prestosu homenaxe na “Casa Blanca”, onde tuvo asitiáu el Conseyu Soberanu d’Asturies y Llión, el postrer gobiernu democráticu d’Asturies, talamente como recordó’l presentaor del actu, Mariu Arbesú, faciéndose una ufrienda floral y canciándose La Flor del Agua.